BLABBERMOUT’ BABSIE: Revenge of a hurt woman
Tue, May 08, 2012 - 12:00 AM
It en always easy to turn de ethuh cheek!
“Hell hath no fury like a woman scorned!” Ef yuh don’ believe dat, I sorry fuh yuh, ’cause mo’ an’ mo’ yuh hear stories to prove dah sayin’ is as true as John 3:16! Some men tek it as a joke an’ don’ gi’e it a t’ought when duh decide to en’ a relationship fuh one reason or de ethuh, an’ jes’ dump duh partner an’ g’long duh merry way widout even a backward glance! Some women, ef de brek-up real hurtful, would go to de en’s o’ de earf to get revenge ef duh believe duh en get a fair deal!
Ef dem feelin’s stay an’ fester, who is to tell wuh could happen. One day, evuht’ing might jes’ blow up, an’ when dah happen – look out! Remember de Bobbit woman dat went to she husban’ wid a carvin’ knife one night when he was sleepin’ an’ slice off ’e prize possession an’ fling it ‘way in a side road? Lucky fuh he dat de doctors fine it in time an’ was able to stitch it back on! Sence den, ethuh women had de same idea an’ I t’ink it would pay men dat onfair an’ abuse women to sleep always wid one eye open. Duh never know when de ax gine fall!
De way one woman recently went ’bout gettin’ she revenge was real “sweet”, doh! She quietly an’ calmly pull out evuh one o’ she ex-lover teef! As she was a dentis’, it din hard to do, ’specially when he went to she surgery to get relief from toofache.
I don’ know ef de toofache turn ’e brain sof’ an ’e was lookin’ fuh a “freeness”, but he had to be a real “moojin” to t’ink dat de woman he jes’ recently brek up wid would look ’pon he wid love an’ affection an’ help ’e out ’cause he was sufferin’ from toofache.
Wuhevuh de reason, dere he was, stretch out in de dentis’ chair, awaitin’ relief! An’ dah is exackly wuh she gi’e ’e! Relief from evuh toof in ’e mouf! Dah was a show o’ real arrogance ’pon he part, t’inkin’ dat she would still look ’pon he as a frien’, but yuh know how de ego could get we in some good trouble at times!
Imagine de shock he mussee went t’rough when ’e head clear from de anest’etic an’ ’e realize wuh was happenin’! An’ don’ talk ’bout de pain!! He would never fuhget dat woman! As Philomena an’ me bofe agree, endin’ a relationship en neffin, but de way how yuh en’ it does bring ’bout de problem!
She get t’ree years in prison, but I won’ be surprise ef de satisfaction she get from seein’ he toofless gine mek dem t’ree years bearable! He, ’pon de ethuh han’, now got to spen’ a mob-a-on o’ money fuh “implants”, an’ de new girlfrien’ gone wid de win’ – she en want no toofless man!
Mos’ women does turn de ethuh cheek when duh get onfair. After all, de Almighty don’ sleep an’ we always reap wuh we sow! Dah true as John 3:16 as well – cyahn sow limes an’ reap apples – but ethuhs prefer to put duh han’s to de plough an’ assis’ wid de harvestin’ to help de crop come in mo’ fas’!
Mebbee dah dentis’ din inten’ to do it but she feelin’s tek over an’ she decide to turn de tables ’pon she “ex”! T’ree years later she gine be out, but he, wid all ’e new false teef, gine never be de same agen. Whoevuh believe woman is de weaker sex, should t’ink agen! I once hear dat a li’l axe could cut down a big tree. How true!
Tek care o’ yuhself,
Yuh frien’ Babsie
- Editor's Choice