Nation e-Edition

Yuh cyahn do bad an’ see good

Yuh cyahn do bad an’ see good

Tue, November 13, 2012 - 12:01 AM

Dear Nesta,

How life treatin’ yuh, dear heart? I still hey in de lan’ o’ de livin’, pullin’ muh belt mo’ an’ mo’ tight as de prices go up an’ up, an’ not a bit o’ relief in sight! But, neffin does las’ fuhevuh, an’ better days mus’ come, so I waitin’!

Chile, we still waitin’ to hear wuh gine happen at de Alexandra School sence de inquiry done! De commissioner recommendations gone to de PM, an’ evuhbody t’ought ’e was gine mek de report an official document o’ de House las’ week, but fuh some reason, it din happen! Philomena was ‘mong all dem “eager beavers” waitin’ fuh de news, but it din surprise me, we should get ‘ccustom to dis sort o’ treatment by now! Bajans got to wait a li’l while longer befo’ duh know how t’ings gine turn out fuh all dem actors in dah recent fiasco, but it en stoppin’ nuff talk from flyin’ ‘roun’ ‘bout who gettin’ transfer, whey duh gine, who stayin’ an’ who gine home! Dis Alexandra saga like it gine never en’!

Well, Barack Obama still livin’ ’pon Pennsylvania Avenue, aldoh all dem ole white Republicans wid mo’ dollars dan sense try to move heaven an’ earf to get he from ‘bout dey! Some o’ duh supporters was wearin’ tee shirts wid de words “Put White back in de White House”, ethuhs had placards wid de same wordin’ . . . all to no avail!   

I sure you stop up dey in Engelant an’ hear Philomena, muhself an’ a whole lot o’ Bajans las’ Tuesday night, hollerin’ we heads off when duh announce de final results! Wuh, after all, yuh could almos’ counk we as one o’ de Amurican states, right? Romney was so sure o’ winnin’ dat it appear he was onwillin’ to believe ’e ears, an’ it was some while befo’ ’e was able to come out an’ concede defeat. Anyway, when he did appear, ’e speech was very gracious. One o’ ’e advisers report dat dis defeat like it got ’e shellshock! I en know how true, but apparently he had ’e victory speech all ready fuh de occasion, but as it turn out, he had to rip dah up, an’ fuhget de White House!  

I onderstan’ mo’ dan one Republican group spen’ millions to get rid o’ Barack Obama! Dem mus’ really hate dah man, an’ all ’cause ’e skin colour don’ suit dem. Duh sayin’ de “traditional” Amurica disappearin’, an’ lookin’ at de vas’ crowd cheerin’, wavin’ flags an’ huggin’ one anethuh dat night, duh c’n speak a truer word! De colour o’ Amurica changin’, an’ duh could’s well accep’ dat fack! Lord mek peace, duh try evuh hateful trick in de book to use ’gainst Mr Obama – an’ he still come out ‘pon top! But evuhbody know de Republicans gine try to mek ’e snort dese nex’ four years!

Elections scarcely over, befo’ de pundits startin’ to t’row out names fuh 2016, an’ Hillary Clinton name gettin’ call right off by de Democrats. Well, firs’, a black president, so why not a woman nex’, an’ who better dan Hillary. But lookin’ pas’ 2016, de talk is ‘bout de rapid growf o’ de Hispanic community, an’ how, one o’ dese days, an’ not too far off neiduh, a Latino might be in de runnin’ fuh de White House! Dah would really be tummuch fuh Donal’ Trump an’ comp’ny!

Obama din de onlies’ winner! Tuesdy night, a few states ‘gree’ to pass laws legalizin’ marijuana fuh medicinal purposes! Dem really “gone to pot”! Well, as long as people don’ fin’ a way to beat de system an’ misuse it, a lot’ o’ sick people should benefit. But passin’ laws as well to legalize same-sex marriages, is a horse o’ a diff’rent colour! Whey dis worl’ headin’, neh?     

Tek care o’ yuhself
Yuh frien’ Babsie

  • Editor's Choice

Share your thoughts

Please sign in or register to post your comments.

Latest Videos

Quick Poll

Do you believe that the Barbados Bar Association has been effective in dealing with cases of theft when they have been brought before them?

View Past Polls

Stay Connected to Your World

Join Your Friends & Our Community

Your Friends' Activity

Daily Cartoons

  • September 15, 2014 - 2014 09 15
  • September 14, 2014 - 2014 09 14
  • Saturday Sept 13 2014 toon - 2014 09 13